د ژوند ايرې به هم انګار د محبت وښائي
تالا ګلشن کښې به بهار د محبت وښائي
زما د زړه وينو ښائسته کړو تصور د جانان
رقيب دې هم داسې سنګار د محبت وښائي
استکاران دي د فريب او د ريا د هنر
هغوي به څه رنګه روزګار د محبت وښائي
چې زړه پرې ورکړم د غصې رنګونه واخلم ترينه
څوک دي چې داسې خريدار د محبت وښائي
نشته څوک نشته چې جذبې مو قتليدو نه بچ کړي
زور وحشتونو ته يو وار د محبت وښائي
چې هر طرف ته د سيکهو د شړنګا شور دې راخور
پازيب به څه رنګې شړنګار د محبت وښائي
که نور څه نه لرو د زړونو نغديت خو لرو
مونږ ته به څوک دلته بازار د محبت وښائي
اصحاب کهف غوندې د تور غار نه راووتلو
نوې رڼا ده څوک به لار د محبت وښائي
مينه لرو خو د الفاظو ژبې ګونګې مو دي
ګران له ورځو چې لږ اظهار د محبت وښائي
0 comments:
Post a Comment